ಶೌಚಾಲಯದಿಂದಲೇ ವೀಡಿಯೋ ಕಾನ್ಫರೆನ್ಸ್ ಮೂಲಕ ಕೋರ್ಟ್ ಗೆ ಹಾಜರು: ದಂಡ ವಿಧಿಸಿ ಬಿಸಿ ಮುಟ್ಟಿಸಿದ ನ್ಯಾಯಾಲಯ

ಗುಜರಾತ್: ಶೌಚಾಲಯದಿಂದಲೇ ವೀಡಿಯೋ ಕಾನ್ಫರೆನ್ಸ್ ಮೂಲಕ ಕೋರ್ಟ್ ಕಲಾಪಕ್ಕೆ ಹಾಜರಾಗಿ ನ್ಯಾಯಾಲಯದ ಘನತೆಗೆ ಧಕ್ಕೆ ತಂದ ವ್ಯಕ್ತಿಗೆ 2 ಲಕ್ಷ ದಂಡ ವಿಧಿಸಿ ಗುಜರಾತ್ ಹೈಕೋರ್ಟ್ ಬಿಸಿ ಮುಟ್ಟಿಸಿದೆ.

ಪ್ರಕರಣದಲ್ಲಿ ಪ್ರತಿವಾದಿಯ ಪುತ್ರ ಧವಲ್ ಬಾಯ್ ಕನುಭಾಯ್ ಪಟೇಲ್ ಎಂಬಾತ ಶೌಚಾಲಯದಿಂದಲೇ ಹೈಕೋರ್ಟ್ ಕಲಾಪಕ್ಕೆ ವರ್ಚುವಲ್ ವಿಚಾರಣೆ ಮೂಲಕ ಹಾಜರಾಗಿದ್ದ. ಈ ಘಟನೆಗೆ ಸಂಬಂಧಿಸಿದ ವೀಡಿಯೋ ವೈರಲ್ ಆಗಿತ್ತು. ಈತನ ವರ್ತನೆಗೆ ಅಸಮಾಧಾನ ವ್ಯಕ್ತಪಡಿಸಿದ ಗುಜರಾತ್ ಹೈಕೋರ್ಟ್ ನ್ಯಾಯಮೂರ್ತಿ ಎಂ.ಕೆ. ಠಕ್ಕರ್, ಹೈಕೋರ್ಟ್ ಕಲಾಪದಲ್ಲಿ ಈತ ಭಾಗಿಯಾಗಿದ್ದು, ಆತನ ವರ್ತನೆ ನ್ಯಾಯಾಲಯದ ಘನತೆಗೆ ಧಕ್ಕತೆ ತಂದಿದೆ. ಇದು ನಿಜಕ್ಕೂ ನಾಚಿಕೆಗೇಡಿನ ಸಂಗತಿ ಮತ್ತು ಅಸಭ್ಯ ಕೃತ್ಯ ಸ್ವೀಕಾರಾರ್ಹವಲ್ಲ ಎಂದು ಕಿಡಿಕಾರಿತು.

ಈ ಘಟನೆಗೆ ಸಂಬಂಧಿಸಿದ ವೀಡಿಯೋ ವೈರಲ್ ಆಗಿ ತನಿಖೆ ನಡೆಸುವಂತೆ ಸೂಚಿಸಿ ನ್ಯಾಯಾಲಯ ವೀಡಿಯೋದಲ್ಲಿ ಇರುವ ವ್ಯಕ್ತಿಯನ್ನು ಗುರುತಿಸಲು ಸೋಲಾ ಪೊಲೀಸ್ ಠಾಣೆಗೆ ಸೂಚನೆ ನೀಡಿತ್ತು. ಆಗ ಈತನ ಕೃತ್ಯ ಬಯಲಾಗಿದ್ದು, ಘಟನೆಗೆ ಸಂಬಂಧಿಸಿದಂತೆ ಪ್ರತಿವಾದಿ (ತಂದೆ) ಹಾಗೂ ಅವರ ಪರ ವಕೀಲರು ಕ್ಷಮೆಯಾಚಿಸಿ ಈ ಘಟನೆ ಆಕಸ್ಮಿಕ ಹಾಗೂ ಉದ್ದೇಶಪೂರ್ವಕವಲ್ಲ. ಎಂದು ನ್ಯಾಯಪೀಠಕ್ಕೆ ನಿವೇದಿಸಿಕೊಂಡರು.

42 ವರ್ಷ ಪ್ರಾಯದ ಈತ ಪದವೀಧರನಾಗಿದ್ದು, ರಿಲಯನ್ಸ್ ಸಮೂಹ ಸಂಸ್ಥೆಯಲ್ಲಿ ಉದ್ಯೋಗಿಯಾಗಿದ್ದ. ಆತನಿಗೆ ಜೂಮ್ ಅಪ್ಲಿಕೇಷನ್ ಬಗ್ಗೆ ಗೊತ್ತಿಲ್ಲ ಎಂಬ ವಿಚಾರ ಒಪ್ಪತಕ್ಕದ್ದಲ್ಲ ಎಂದ ನ್ಯಾಯಪೀಠವು ನ್ಯಾಯಾಂಗದ ಘನತೆಗೆ ಧಕ್ಕೆ ತಂದ ವ್ಯಕ್ತಿಗೆ 2 ಲಕ್ಷ ರೂ.ಗಳ ದಂಡ ವಿಧಿಸಿ ತೀರ್ಪು ನೀಡಿತು. ಹಾಗೆಯೇ ಎರಡು ವಾರದೊಳಗೆ ದಂಡದ ಮೊತ್ತವನ್ನು ಹೈಕೋರ್ಟ್ ರಿಜಿಸ್ಟ್ರಿಗೆ ಠೇವಣಿ ಇಡಬೇಕು. ಠೇವಣಿ ನೀಡಿದ ಈ ಮೊತ್ತದಲ್ಲಿ ರೂ. 50 ಸಾವಿರ ಅಹಮದಾಬಾದ್ ನ ಶಿಶು ಗೃಹ ಖಾತೆಗೆ ಹಾಗೂ ಉಳಿದ ಮೊತ್ತವನ್ನು ಗುಜರಾತ್ ಹೈಕೋರ್ಟ್ ಕಾನೂನು ನೆರವು ಸೇವೆಗಳ ಪ್ರಾಧಿಕಾರಗಳ ಖಾತೆಗೆ ಜಮಾ ಮಾಡುವಂತೆ ಕೋರ್ಟ್ ಪಕ್ಷಕಾರರಿಗೆ ನಿರ್ದೇಶನ ನೀಡಿತು.

ಸಂಪಾದಕರು
ಲಾಗೈಡ್ ಕನ್ನಡ‌ ಕಾನೂನು ಮಾಸಪತ್ರಿಕೆ