ತೆಲಂಗಾಣ ಬಾರ್ ಕೌನ್ಸಿಲ್ ಚುನಾವಣೆ ಭಾರೀ ವಿವಾದಕ್ಕೆ ತುತ್ತಾಗಿದೆ.

ತೆಲಂಗಾಣ ಬಾರ್ ಕೌನ್ಸಿಲ್ ಚುನಾವಣೆ ಭಾರೀ ವಿವಾದಕ್ಕೆ ತುತ್ತಾಗಿದೆ. ಚಲಾವಣೆಯಾದ ಸುಮಾರು 500 ಮತಗಳಲ್ಲಿ 200ಕ್ಕೂ ಹೆಚ್ಚು ಮತಗಳು ಮೂಲಭೂತ ದೋಷಗಳ ಕಾರಣದಿಂದ ಅಮಾನ್ಯವಾಗಿರುವುದಾಗಿ ವರದಿಯಾಗಿದೆ.

ಜನವರಿ 30ರಂದು 23 ಸದಸ್ಯರ ಆಯ್ಕೆಗಾಗಿ ನಡೆದ ಮತದಾನದ ಎಣಿಕೆ ಮಂಗಳವಾರ ಆರಂಭಗೊಂಡಿದ್ದು, ಚುನಾವಣಾ ವೀಕ್ಷಕರು ಇನ್ನೂ ಅಧಿಕೃತ ಘೋಷಣೆ ಮಾಡಿಲ್ಲ. ಆದರೆ ಎಣಿಕೆ ಪ್ರಕ್ರಿಯೆಯಲ್ಲಿ ಕಂಡುಬಂದ ತಪ್ಪುಗಳು ಕಾನೂನು ವಲಯದಲ್ಲೇ ತೀವ್ರ ಚರ್ಚೆಗೆ ಕಾರಣವಾಗಿವೆ.

ಬಾರ್ ಕೌನ್ಸಿಲ್ ಸೂಚನೆಗಳ ಪ್ರಕಾರ ಮತದಾರರಾದ ವಕೀಲರು ತಮ್ಮ ಅಭ್ಯರ್ಥಿಗಳಿಗೆ ಆದ್ಯತೆ ಸೂಚಿಸಲು “ಒಂದು, ಎರಡು, ಮೂರು…” ಎಂದು ದೊಡ್ಡ ಅಕ್ಷರಗಳಲ್ಲಿ ಗರಿಷ್ಠ 23 ಆದ್ಯತೆಗಳವರೆಗೆ ಬರೆಯಬೇಕು. ಕನಿಷ್ಠ ಐದು ಆದ್ಯತೆಗಳನ್ನು ದಾಖಲಿಸುವುದು ಕಡ್ಡಾಯವಾಗಿತ್ತು. ಆದರೆ ಬಹುಪಾಲು ವಕೀಲರು ಈ ಮೂಲಭೂತ ನಿಯಮಗಳನ್ನೇ ಪಾಲಿಸದಿರುವುದು ಅಚ್ಚರಿ ಮೂಡಿಸಿದೆ.

ಆದ್ಯತೆಗಳನ್ನು ತಪ್ಪಾಗಿ ಬರೆಯುವುದು, ದೊಡ್ಡ ಅಕ್ಷರ ಬಳಸದಿರುವುದು, ತಪ್ಪು ಕ್ರಮದಲ್ಲಿ ಗುರುತಿಸುವುದು ಮತ್ತು ಕಾಗುಣಿತ ದೋಷಗಳು—ಈ ಕಾರಣಗಳಿಂದಲೇ 200ಕ್ಕೂ ಹೆಚ್ಚು ಮತಪತ್ರಗಳು ತಿರಸ್ಕೃತವಾಗಿರುವುದಾಗಿ ಮಾಹಿತಿ. ಅನೇಕ ಮತಪತ್ರಗಳಲ್ಲಿ “ಒಂದು, ಎರಡು, ಮೂರು” ಪದಗಳನ್ನೇ ತಪ್ಪಾಗಿ ಬರೆಯಲಾಗಿದೆ ಎನ್ನುವುದು ಮತ್ತಷ್ಟು ಚರ್ಚೆಗೆ ಕಾರಣವಾಗಿದೆ.

ಈ ಬೆಳವಣಿಗೆ ಕಾನೂನು ಸಮುದಾಯದೊಳಗೂ ಹೊರಗೂ ತೀವ್ರ ಟೀಕೆಗೆ ಗುರಿಯಾಗಿದೆ. ಹೈಕೋರ್ಟ್‌ನಲ್ಲಿ ವಾದಿಸುವ ವಕೀಲರು ಮೂಲಭೂತ ಮತದಾನ ಸೂಚನೆಗಳನ್ನು ಪಾಲಿಸಲು ವಿಫಲರಾಗಿರುವುದು ನಿರಾಶಾಜನಕ ಎಂದು ಅಭಿಪ್ರಾಯ ವ್ಯಕ್ತವಾಗುತ್ತಿದೆ. “ಶಾಲಾ ವಿದ್ಯಾರ್ಥಿಯೂ ತಪ್ಪಿಸಬಹುದಾದ ದೋಷಗಳು ಇದು” ಎಂದು ಕೆಲವರು ಕಿಡಿಕಾರಿದ್ದಾರೆ.

ತಪ್ಪಿಸಬಹುದಾದ ಈ ದೋಷಗಳಿಂದ ದೊಡ್ಡ ಪ್ರಮಾಣದ ಮತಗಳ ಅಮಾನ್ಯೀಕರಣವಾಗಿರುವುದು ಸ್ಪರ್ಧಿಸಿದ್ದ ಅಭ್ಯರ್ಥಿಗಳ ಫಲಿತಾಂಶಗಳ ಮೇಲೆಯೂ ಪರಿಣಾಮ ಬೀರುವ ಸಾಧ್ಯತೆ ಇದೆ ಎಂಬುದನ್ನು ವೀಕ್ಷಕರು ಸೂಚಿಸಿದ್ದಾರೆ.

ಸಂಪಾದಕರು
ಲಾಗೈಡ್ ಕನ್ನಡ‌ ಕಾನೂನು ಮಾಸಪತ್ರಿ