ಸ್ಟೆನೋಗ್ರಾಫರ್ ವೇತನ: ಶೆಟ್ಟಿ ಆಯೋಗದ ಶಿಫಾರಸ್ಸನ್ನು 01.04.2003ರಿಂದ ಜಾರಿಗೆ ತನ್ನಿ- ಹೈಕೋರ್ಟ್ ಆದೇಶ

ಮುಂಬೈ: ಜಿಲ್ಲಾ, ಅಧೀನ ನ್ಯಾಯಾಲಯಗಳ ಸಿಬ್ಬಂದಿಗೆ ಬಾಂಬೆ ಹೈಕೋರ್ಟ್ ಸಿಹಿ ಸುದ್ದಿ ನೀಡಿದ್ದು ಸ್ಟೆನೋಗ್ರಾಫರ್ ವೇತನ ಕುರಿತ ನ್ಯಾಯಮೂರ್ತಿ ಜಗನ್ನಾಥ ಶೆಟ್ಟಿ ಆಯೋಗದ ಶಿಫಾರಸು 01.04.2003ರಿಂದ ಜಾರಿಗೆ ತರಬೇಕು ಎಂದು ಆದೇಶ ಹೊರಡಿಸಿದೆ.

ಮಹಾರಾಷ್ಟ್ರದ ವಿವಿಧ ಜಿಲ್ಲಾ ನ್ಯಾಯಾಲಯಗಳಲ್ಲಿ ಸೇವೆ ಸಲ್ಲಿಸುತ್ತಿರುವ ಸ್ಟೆನೋಗ್ರಾಫರ್ಗಳು ಸಲ್ಲಿಸಿದ್ದ ರಿಟ್ ಅರ್ಜಿಯನ್ನು ವಿಚಾರಣೆ ನಡೆಸಿದ ಬಾಂಬೆ ಹೈಕೋರ್ಟ್ ನ್ಯಾಯಮೂರ್ತಿಗಳಾದ ಕಿಶೋರ್ ಸಿ ಸಂತ ಮತ್ತು ಸುಶೀಲ್ ಎಂ ಫೋಡೇಶ್ವರ್ ಅವರಿದ್ದ ವಿಭಾಗೀಯ ಪೀಠವು, ಮಹಾರಾಷ್ಟ್ರ ರಾಜ್ಯದ ಜಿಲ್ಲಾ ಮತ್ತು ಅಧೀನ ನ್ಯಾಯಾಲಯಗಳಲ್ಲಿ ಕಾರ್ಯನಿರ್ವಹಿಸುತ್ತಿರುವ ಸೈನೋಗ್ರಾಫರ್ ಗಳಿಗೆ ಸಂಬಂಧಿಸಿದಂತೆ, ನ್ಯಾಯಮೂರ್ತಿ ಜಗನ್ನಾಥ ಶೆಟ್ಟಿ ಆಯೋಗದ ಶಿಫಾರಸುಗಳನ್ನು 01.04.2003 ರಿಂದ ಜಾರಿಗೆ ತರಬೇಕು ಹಾಗೂ ಅದರ ಪರಿಣಾಮವಾಗಿ ಉಂಟಾಗುವ ವೇತನ ವ್ಯತ್ಯಾಸದ ಮೊತ್ತವನ್ನು ಆರು ತಿಂಗಳೊಳಗೆ ಪಾವತಿಸಬೇಕು ಎಂದು ಮಹಾರಾಷ್ಟ್ರ ಸರ್ಕಾರಕ್ಕೆ ನಿರ್ದೇಶನ ನೀಡಿದೆ. ಇದಲ್ಲದೆ, 07.10.2009 ರಿಂದ ವಾರ್ಷಿಕ 6% ಬಡ್ಡಿದರದೊಂದಿಗೆ ಬಾಕಿ ಮೊತ್ತವನ್ನು (arrears) ಪಾವತಿಸಬೇಕು ಎಂದು ನ್ಯಾಯಾಲಯ ಆದೇಶಿಸಿದೆ.

ಅರ್ಜಿದಾರರ ವಾದದ ಪ್ರಕಾರ, ಸುಪ್ರೀಂ ಕೋರ್ಟ್ ಎಲ್ಲಾ ರಾಜ್ಯಗಳಿಗೆ ಶೆಟ್ಟಿ ಆಯೋಗದ ಶಿಫಾರಸುಗಳನ್ನು 01.04.2003 ರಿಂದ ಜಾರಿಗೆ ತರಲು ನಿರ್ದೇಶಿಸಿದ್ದರೂ, ರಾಜ್ಯ ಸರ್ಕಾರವು 15.09.2018ರ ಸರ್ಕಾರಿ ನಿರ್ಣಯ ಮೂಲಕ ದೊರೆಯುವ ಕೆಲವು ಸೌಲಭ್ಯಗಳನ್ನು ಆ ದಿನಾಂಕದಿಂದ ಮಾತ್ರ ಅನ್ವಯಿಸುವಂತೆ ಮಾಡಲು ಪ್ರಯತ್ನಿಸಿತ್ತು. “ಶೆಟ್ಟಿ ಆಯೋಗದ ಶಿಫಾರಸುಗಳನ್ನು 01.04.2003 ರಿಂದ ಜಾರಿಗೆ ತರಬೇಕೆಂಬುದು ರಾಜ್ಯ ಸರ್ಕಾರವೇ ಒಪ್ಪಿಕೊಂಡಿರುವ ವಿಷಯವಾಗಿದೆ. 15.09.2018ರ ಸರ್ಕಾರಿ ನಿರ್ಣಯವು 20.10.2011ರ ನಿರ್ಣಯದಲ್ಲಿದ್ದ ವ್ಯತ್ಯಾಸಗಳನ್ನು ಸರಿಪಡಿಸಲು ಮಾತ್ರ ಹೊರಡಿಸಲಾಗಿತ್ತು. ಆದ್ದರಿಂದ ಅದನ್ನು 01.04.2003ರಿಂದ ಅನ್ವಯಿಸದೆ, 15.09.2018ರಿಂದ ಮಾತ್ರ ಅನ್ವಯಿಸುವುದು ಯಾವುದೇ ತಾರ್ಕಿಕ ಆಧಾರವನ್ನು ಹೊಂದಿಲ್ಲ.” ಎಂದು ನ್ಯಾಯಪೀಠ ಹೇಳಿತು.

“ಶೆಟ್ಟಿ ಆಯೋಗದ ಶಿಫಾರಸುಗಳನ್ನು 01.04.2003ರಿಂದ ಜಾರಿಗೆ ತರಬೇಕು ಮತ್ತು ವೇತನ ವ್ಯತ್ಯಾಸವನ್ನು ಆರು ತಿಂಗಳೊಳಗೆ ಪಾವತಿಸಬೇಕು” ಎಂದು ನ್ಯಾಯಪೀಠ ರಾಜ್ಯ ಸರ್ಕಾರಕ್ಕೆ ನಿರ್ದೇಶನ ನೀಡಿತು.

ಪ್ರಕರಣದ ವಿಚಾರಣೆಯಲ್ಲಿ ರಾಜ್ಯ ಸರ್ಕಾರದ ಮನವಿಯ ಮೇರೆಗೆ ಪದೇಪದೇ ಮುಂದೂಡಿಕೆಗಳು (adjournments) ಪಡೆಯಲಾಗಿರುವುದನ್ನು ಗಂಭೀರವಾಗಿ ಗಮನಿಸಿದ ನ್ಯಾಯಪೀಠವು, “ನೌಕರರಿಗೆ ಸಿಗಬೇಕಾದ ಸೌಲಭ್ಯಗಳು ಅಥವಾ ವೇತನವನ್ನು ನೀಡಬೇಕಾದ ಸಂದರ್ಭಗಳಲ್ಲಿ ಮಾತ್ರ ಸಮಯ ಕೇಳಲಾಗುತ್ತದೆ, ಮುಂದೂಡಿಕೆಗಳನ್ನು ಪಡೆಯಲಾಗುತ್ತದೆ ಮತ್ತು ಪ್ರಕರಣಗಳನ್ನು ಅನಗತ್ಯವಾಗಿ ವಿಳಂಬಗೊಳಿಸಲಾಗುತ್ತದೆ.” ಎಂದು ಹೇಳಿತು.

ರಿಟ್ ಅರ್ಜಿಯನ್ನು ಅನುಮೋದಿಸಿದ ಬಾಂಬೆ ಹೈಕೋರ್ಟ್ ಮಹಾರಾಷ್ಟ್ರ ಸರ್ಕಾರವು ಅರ್ಜಿದಾರ ಸೈನೋಗ್ರಾಫರ್ ಗಳಿಗೆ ಸಂಬಂಧಿಸಿದಂತೆ ಶೆಟ್ಟಿ ಆಯೋಗದ ಶಿಫಾರಸುಗಳನ್ನು 01.04.2003ರಿಂದ ಜಾರಿಗೆ ತರಬೇಕು, ವೇತನ ವ್ಯತ್ಯಾಸದ ಮೊತ್ತವನ್ನು ಆರು ತಿಂಗಳೊಳಗೆ ಪಾವತಿಸಬೇಕು ಹಾಗೂ 07.10.2009ರಿಂದ ವಾರ್ಷಿಕ 6% ಬಡ್ಡಿಯೊಂದಿಗೆ ಬಾಕಿ ಮೊತ್ತವನ್ನು ಪಾವತಿಸಬೇಕು ಎಂದು ಆದೇಶ ಹೊರಡಿಸಿತು.

ಸಂಪಾದಕರು
ಲಾಗೈಡ್ ಕನ್ನಡ‌ ಕಾನೂನು ಮಾಸಪತ್ರಿ