ದಂಪತಿ ನಡುವಿನ ಕಲಹದಲ್ಲಿ ಮಗು ಅಸ್ತ್ರವಾಗಬಾರದು- ಪೋಕ್ಸೋ ಕೇಸ್ ರದ್ದುಗೊಳಿಸಿದ ಹೈಕೋರ್ಟ್

ಬೆಂಗಳೂರು: ದಂಪತಿಗಳ ನಡುವಿನ ಕಲಹದಲ್ಲಿ ಮಗುವನ್ನು ಒಂದು ಅಸ್ತ್ರವನ್ನಾಗಿ ಬಳಸಬಾರದು. ಬಾಲ್ಯದ ಮುಗ್ಧತೆಯನ್ನು ದಂಪತಿಗಳ ನಡುವಿನ ವೈಯಕ್ತಿಕ ದ್ವೇಷ ಅಥವಾ ಲೆಕ್ಕಾಚಾರಗಳನ್ನು ತೀರಿಸಿಕೊಳ್ಳುವ ಸಾಧನವನ್ನಾಗಿ ಮಾಡಿಕೊಳ್ಳಬಾರದು ಎಂದು ಹೇಳಿದ ಹೈಕೋರ್ಟ್ ಈ ಸಂಬಂಧ ಪತಿ ಮತ್ತು ಅವರ ಮನೆಯವರ ವಿರುದ್ದ ದಾಖಲಾಗಿದ್ದ ಪೋಕ್ಸೋ ಪ್ರಕರಣವನ್ನ ರದ್ದುಗೊಳಿಸಿದೆ.

ತಮ್ಮ ನಾಲ್ಕೂವರೆ ವರ್ಷದ ಮಗಳ ಮೇಲೆ ಮನೆಯಲ್ಲಿ ಲೈಂಗಿಕ ದೌರ್ಜನ್ಯ ನಡೆದಿದೆ ಎಂದು ಆರೋಪಿಸಿ ಮಹಿಳೆಯೊಬ್ಬರು ತಮ್ಮ ಪತಿ, ಅತ್ತೆ-ಮಾವ ಮತ್ತು ನಾದಿನಿಯ ವಿರುದ್ಧ ‘ಪೋಕ್ಸೊ’ (POCSO) ಕಾಯ್ದೆಯಡಿ ದಾಖಲಿಸಿದ್ದ ಪ್ರಕರಣವನ್ನು ನ್ಯಾಯಮೂರ್ತಿ ಎಂ. ನಾಗಪ್ರಸನ್ನ ಅವರು ರದ್ದುಗೊಳಿಸಿದರು. ದಂಪತಿಗಳ ನಡುವಿನ ಜಗಳದಲ್ಲಿ ಮಗುವನ್ನು ಅಸ್ತ್ರವನ್ನಾಗಿ ಬಳಸಿಕೊಳ್ಳಬಾರದು. ಪೋಷಕರೊಬ್ಬರು ತಮ್ಮ ಮೇಲೆ ಸುಳ್ಳು ಆರೋಪ ಹೊರಿಸಲಾಗಿದೆ ಎಂದು ವಾದಿಸುವ ಭರದಲ್ಲಿ, ಮಗುವಿನ ರಕ್ಷಣೆಯ ಹಕ್ಕನ್ನು ಬಲಿಗೊಡಲು ಸಾಧ್ಯವಿಲ್ಲ ಎಂದು ಅಭಿಪ್ರಾಯಪಟ್ಟಿದೆ.

ಪ್ರಕರಣದ ವಿವರ.
2018ರಲ್ಲಿ ಈ ದಂಪತಿ ವಿವಾಹವಾಗಿದ್ದು, 2022ರಲ್ಲಿ ಅವರಿಗೆ ಹೆಣ್ಣುಮಗು ಜನಿಸಿತು. 2024ರಲ್ಲಿ ದಂಪತಿಗಳ ನಡುವೆ ವೈವಾಹಿಕ ಸಂಘರ್ಷ ಉಂಟಾಗಿ. ಪತ್ನಿಯು ಮಗಳನ್ನು ಭೇಟಿಯಾಗದಂತೆ ಅಥವಾ ಅವಳೊಂದಿಗೆ ಬೆರೆಯದಂತೆ ತಡೆಹಿಡಿದಿದ್ದರು. ಹೀಗಾಗಿ ಪತಿಯು ಮಗಳನ್ನು ಭೇಟಿಯಾಗುವ ಹಕ್ಕನ್ನು ಕೋರಿ ಹೈಕೋರ್ಟ್ಗೆ ಅರ್ಜಿ ಸಲ್ಲಿಸಿದರು. ಹೈಕೋರ್ಟ್ ಅವರಿಗೆ ಮೇ 2026ರಲ್ಲಿ ಎರಡು ದಿನಗಳ ಕಾಲ ಮಗಳನ್ನು ಭೇಟಿಯಾಗಲು ಅನುಮತಿ ನೀಡಿತು. ಅದರಂತೆ ಆ ವ್ಯಕ್ತಿ ಮಗಳನ್ನು ತನ್ನ ಮನೆಗೆ ಕರೆದೊಯ್ದಿದ್ದರು. ಆದರೆ, ಮಗಳನ್ನು ಮತ್ತೆ ತಾಯಿಯ ವಶಕ್ಕೆ ಒಪ್ಪಿಸಿದ ನಂತರ ಮಗುವಿನ ಖಾಸಗಿ ಅಂಗಗಳ ಸುತ್ತ ಕೆಂಪಾಗಿದ್ದು, ತೊಂದರೆಯಾಗುತ್ತಿದೆ ಎಂದು ಮಗು ದೂರಿತು ಎಂದು ಆರೋಪಿಸಲಾಗಿದ್ದು, ಇದರ ಆಧಾರದ ಮೇಲೆ ಪತಿ, ಅತ್ತೆ-ಮಾವ ಮತ್ತು ನಾದಿನಿಯ ವಿರುದ್ಧ ‘ಪೋಕ್ಸೊ’ ಕಾಯ್ದೆಯಡಿ ಪ್ರಕರಣ ದಾಖಲಿಸಲಾಯಿತು. ಮಗುವನ್ನು ಪರೀಕ್ಷೆಗೆ ಒಳಪಡಿಸಿದ ಆಸ್ಪತ್ರೆಯ ಇಬ್ಬರು ವೈದ್ಯರಿಗೆ ಪ್ರಮಾಣಪತ್ರ (ಅಫಿಡವಿಟ್) ಸಲ್ಲಿಸುವಂತೆ ನ್ಯಾಯಾಲಯ ನಿರ್ದೇಶಿಸಿತು.

ವೈದ್ಯರೊಬ್ಬರು ಇಂತಹ ಲಕ್ಷಣಗಳು ಅಲರ್ಜಿ, ಉರಿಯೂತ, ಅಥವಾ ಉಜ್ಜುವಿಕೆ ಅಥವಾ ಕೆರೆತದಿಂದ ಉಂಟಾಗುವ ದೈಹಿಕ ಕಿರಿಕಿರಿ ಅಥವಾ ಗಾಯದಂತಹ ವಿವಿಧ ಕಾರಣಗಳಿಂದ ಉಂಟಾಗಬಹುದು ಎಂದು ತಿಳಿಸಿದರು. ಇನ್ನೊಬ್ಬ ವೈದ್ಯರೂ ಕೂಡಾ ಇದೇ ರೀತಿಯ ಕಾರಣಗಳನ್ನು ನೀಡಿದ್ದು, ಆರೋಪಕ್ಕೆ ವಸ್ತುನಿಷ್ಠ ಆಧಾರವನ್ನು ಒದಗಿಸಬೇಕಿದ್ದ ವೈದ್ಯಕೀಯ ಸಾಕ್ಷ್ಯವು, ಕಂಡುಬಂದ ಲಕ್ಷಣಗಳಿಗೆ ನಿರ್ದಿಷ್ಟ ಕಾರಣವನ್ನು ಖಚಿತವಾಗಿ ತಿಳಿಸಿಲ್ಲ ಎಂದು ನ್ಯಾಯಪೀಠ ಹೇಳಿತು. ಇಬ್ಬರು ವೈದ್ಯರಲ್ಲಿ ಯಾರೊಬ್ಬರೂ ಈ ದೈಹಿಕ ಲಕ್ಷಣಗಳಿಗೆ ನಿರ್ದಿಷ್ಟ ಕಾರಣವನ್ನು ದೃಢಪಡಿಸಿಲ್ಲ.

ಇನ್ನು ಇದಾದ ಬಳಿಕ ಪತಿಯ ಕುಟುಂಬ ಸದಸ್ಯರ ವಿರುದ್ಧ ಯಾವುದೇ ನಿರ್ದಿಷ್ಟ ಆರೋಪಗಳಿಲ್ಲದಿದ್ದರೂ ಅವರನ್ನು ಪ್ರಕರಣದಲ್ಲಿ ಸಿಲುಕಿಸಿರುವುದು, ವೈವಾಹಿಕ ಕಹಿ ಸಂಬಂಧದಿಂದ ಉಂಟಾದ ವೈಯಕ್ತಿಕ ದ್ವೇಷವನ್ನು ತೀರಿಸಿಕೊಳ್ಳುವ ಪ್ರಯತ್ನದ ಸ್ಪಷ್ಟ ಲಕ್ಷಣಗಳನ್ನು ಹೊಂದಿದೆ ಎಂಬುದನ್ನು ನ್ಯಾಯಪೀಠವು ಗಮನಿಸಿತು. ಇಂತಹ ಕ್ರಮಗಳು ವ್ಯಕ್ತಿಯ ಘನತೆಗೆ ಧಕ್ಕೆ ತರುವಂತಹ ಬದಲಾಯಿಸಲಾಗದ ಪರಿಣಾಮಗಳಿಗೆ ಎಡೆಮಾಡಿಕೊಡುತ್ತವೆ. ಈ ಹಿನ್ನೆಲೆಯಲ್ಲಿ ಪತ್ನಿಯ ವಿರುದ್ಧ POCSO ಕಾಯಿದೆಯ ಸೆಕ್ಷನ್ 22ರ ಅಡಿಯಲ್ಲಿ ಕಾನೂನು ಕ್ರಮ ಜರುಗಿಸಲು ಹೈಕೋರ್ಟ್ ಪತಿಗೆ ಅವಕಾಶ ನೀಡಿದೆ.

ವ್ಯಕ್ತಿಯನ್ನು ಅವಮಾನಿಸುವ, ಅವರಿಂದ ಹಣ ವಸೂಲಿ ಮಾಡುವ, ಬೆದರಿಸುವ ಅಥವಾ ಅವರ ಮಾನಹಾನಿ ಮಾಡುವ ಉದ್ದೇಶದಿಂದ ನೀಡಲಾಗುವ ಸುಳ್ಳು ದೂರುಗಳು ಮತ್ತು ಸುಳ್ಳು ಮಾಹಿತಿಯು ದುರುದ್ದೇಶಪೂರ್ಣ ಕೃತ್ಯಗಳಾಗಿವೆ ಎಂಬುದನ್ನು ಇದು ಗುರುತಿಸುತ್ತದೆ. ಕಾನೂನಿನ ನಿಬಂಧನೆಗಳಿಗೆ ಅಗತ್ಯವಾದ ಅಂಶಗಳು ಪೂರೈಸಲ್ಪಟ್ಟರೆ ಮತ್ತು ಕಾನೂನಿಗೆ ಅನುಗುಣವಾಗಿದ್ದರೆ, ಅರ್ಜಿದಾರರು ಸೂಕ್ತವೆನಿಸಿದರೆ, ಸೆಕ್ಷನ್ 22ರ ಅಡಿಯಲ್ಲಿ ಕಾನೂನು ಕ್ರಮವನ್ನು ಪ್ರಾರಂಭಿಸಬಹುದು ಎಂದು ನ್ಯಾಯಪೀಠವು ತಿಳಿಸಿತು.

ಎಚ್ ಎನ್ ವೆಂಕಟೇಶ್
ಗೌರವ ಸಂಪಾದಕರು
ಲಾ ಗೈಡ್ ಕನ್ನಡ ಕಾನೂನು ಮಾಸಪತ್ರಿಕೆ
ಮೈಸೂರು